Express Today

 *దేశంలో ఇ మొబిలిటీ వాహన వృద్దికి విస్రృత అవకాశాలు : శైలేష్ విక్రమ్ సింగ్* 

 *కాలుష్య నివారణ క్రమంలో ఎలక్ట్రిక్ వాహనాలదే రానున్న కాలం : హేమ చంద్రా రెడ్డి* 

‘‘ *ఇ-మొబిలిటీ - భారతీయ, ప్రపంచ దృక్పథం’’ అనే అంశంపై యార్లగడ్డ శ్రీరాములు పద్దెనిమిదవ స్మారక ఉపన్యాసం* 

భారత దేశంలో ఇ మొబిలిటీ వాహన వృద్దికి విస్రృత అవకాశాలు ఉన్నాయని మాసివ్ మొబిలిటీ సహ వ్యవస్థాపకుడు శైలేష్ విక్రమ్ సింగ్ అన్నారు. ద్విచక్ర వాహనాల నుండి మొదలైన ఇ మొబిలిటీ భవిష్యత్తులో భారీ వాహన శ్రేణికి కూడా అన్వయించ బడుతుందన్నారు. ఇన్‌స్టిట్యూషన్ ఆఫ్ ఇంజనీర్స్ రాష్ట్ర శాఖ, మాలక్ష్మి గ్రూపు సంయిక్త ఆధ్వర్యంలో విజయవాడ మధు మాలక్ష్మి ఛాంబర్స్ లో బుధవారం నిర్వహించిన యార్లగడ్డ శ్రీరాములు పద్దెనిమిదవ స్మారక ఉపన్యాస కార్యక్రమంలో ‘‘ఇ-మొబిలిటీ - భారతీయ, ప్రపంచ దృక్పథం’’ అనే అంశంపై హైబ్రీడ్ విధానంలో విక్రమ్ సింగ్ ప్రసంగించారు. ఈ సందర్భంగా శైలేష్ విక్రమ్ సింగ్ మాట్లాడుతూ నాలుగు చక్రాల వాహానాల నుండి గ్లోబల్ ఎలక్ట్రిఫికేషన్ ప్రారంభమైందన్నారు. అందుబాటులో ఉన్న ఇంధన వ్యయంతో పోల్చితే ఇ మొబిలిటీ అతి తక్కువ ఖర్చుతో గరిష్ట ప్రయోజనాన్ని అందిస్తుందన్నారు. తక్కువ బరువు, కనిష్ట వేగంతో కూడిన వాణిజ్య వాహానాల నుండి భారతదేశంలో ఎలక్ట్రిక్ మొబిలిటీ ప్రారంభమైందని వివరించారు.

ఇ మొబిలిటీ విధానంలో వాహానానికి నిర్ధేశించిన పెట్టుబడిని అతి తక్కువ కాలంలో పూర్తి స్ధాయిలో వెనక్కి రాబట్టు కోవచ్చని శైలేష్ అన్నారు. ప్రపంచవ్యాప్తంగా నాలుగు చక్రాల ప్యాసింజర్ వాహనాలు ఆటో రంగంలో ఆధిపత్యం చెలాయిస్తున్నాయని అదే క్రమంలో ఎలక్ట్రిక్ మొబిలిటీలోని అన్ని ఆవిష్కరణలకు ఇదే విభాగం నాయకత్వం వహిస్తుందని వివరించారు. అయితే భారతదేశ వాహన రంగంలో ద్విచక్ర వాహన విభాగం ఆధిపత్యం చెలాయిస్తొందని, ఆటోమొబైల్ రంగ వార్షిక అమ్మకాలలో ఎనభైశాతం వాటా దానిదే ఉందన్నారు. భారతదేశానికి ఉన్న భిన్నమైన అవసరాల దృష్ట్యా ఇ మొబిలిటీకి ఇక్కడ పెద్ద ఎత్తున అవకాశాలు ఉన్నాయన్నారు. 

కార్యక్రమానికి విశిష్ట అతిధిగా హాజరైన ఆంధ్రప్రదేశ్ ఉన్నత విద్యామండలి ఛైర్మన్, ఇన్‌స్టిట్యూషన్ ఆఫ్ ఇంజనీర్స్ రాష్ట్ర శాఖ అధ్యక్షుడు అచార్య కె హేమచంద్రా రెడ్డి మాట్లాడుతూ ఎలక్ట్రిక్ వాహనాలదే రానున్న కాలమని, తద్వారా కాలుష్య సమస్యలకు పరిష్కారం లభిస్తుందన్నారు. కేంద్ర రాష్ట్ర ప్రభుత్వాలు ఎలక్ట్రిక్ వాహానాల వినియోగాన్ని పెంచే క్రమంలో పలు రాయితీలను కూడా అందిస్తున్నాయన్నారు. ఇన్‌స్టిట్యూషన్ ఆఫ్ ఇంజనీర్స్ రాష్ట్ర కార్యదర్సి డాక్టర్ సి.వి. శ్రీరామ్, మా లక్ష్మి గ్రూపు సంస్దల వ్యవస్దాపకులు యార్లగడ్డ హరిశ్చంద్ర ప్రసాద్, ముఖ్య కార్యనిర్వహణ అధికారి మండవ సందీప్, సెడిబస్ సిఇఓ దీప బాలసుబ్రమణ్యన్ తదితరులు కార్యక్రమంలో పాల్గొన్నారు. ప్రపంచ వ్యాప్తంగా ఉన్న ప్రారంభ కంపెనీల ప్రతినిధులు, విద్యార్ధులు పెద్ద సంఖ్యలో ఈ వెబినార్ కు హాజరు కాగా, చివరగా జరిగిన ప్రశ్నోత్తరాల కార్యక్రమం ఆసక్తి కరంగా సాగింది.