Express Today

 *రాజ్ భవన్, విజయవాడ* 

ఆంధ్ర ప్రదేశ్

పత్రికా ప్రకటన

*సంక్రాంతి శుభాకాంక్షలు తెలిపిన గవర్నర్ బిశ్వభూషణ్ హరిచందన్* 

సంక్రాంతి పర్వదినాలను పురస్కరించుకుని ప్రపంచ వ్యాప్తంగా ఉన్న తెలుగు ప్రజలకు ఆంధ్రప్రదేశ్ గవర్నర్ మాననీయ బిశ్వభూషణ్ హరిచందన్ హృదయపూర్వక శుభాకాంక్షలు తెలిపారు. తెలుగు వారి ముఖ్యమైన పండుగగా ఖ్యాతి గడించిన ఈ వేడుకను విశ్వ వ్యాప్తంగా ఉన్న తెలుగు వారంతా జరుపు కుంటారన్నారు. మూడు రోజుల పాటు జరుపుకునే సంక్రాంతి పండుగ మన సంస్కృతీ సంప్రదాయాలలో ఒక ముఖ్యమైన స్థానాన్ని ఆక్రమించిందన్నారు. అంగ్ల సంవత్సరం ప్రారంభంలో వచ్చే సంక్రాంతి పండుగను సమృద్ధిగా ఇంటికి చేరిన ధాన్యసిరుల నడుమ వ్యవసాయ దారులు ఆనందోత్సాహాలతో జరుపుకుంటారని గవర్నర్ పేర్కొన్నారు. ఈ శుభ సందర్భం మనందరిలో ప్రేమ, ఆప్యాయత, సౌభ్రాతృత్వంతో కూడిన ఉదాత్తమైన ఆలోచనలకు ప్రేరణగా నిలవాలన్నారు. సంక్రాంతి వేడుకలు సమాజంలోని అన్ని వర్గాలను పరస్పరం అనుసంధానించే నాటి పురాతన సంప్రదాయాలు, అద్భుతమైన గతానుభవాలను గుర్తుకు తెస్తూ నూతన సంవత్సరానికి నాంది పలుకుతుందని బిశ్వభూషణ్ హరిచందన్ అన్నారు. కొత్త వైవిధ్యాల ఆవిర్భావంతో కరోనా ముప్పు పొంచి ఉన్నందున తగిన జాగ్రత్తలు పాటించడం ద్వారా, ఎవరికి వారు తమ కుటుంబ సభ్యులతో కలిసి ఇంట్లోనే సంక్రాంతి పండుగను జరుపుకోవాలని ఈ సందర్భంగా ప్రజలందరికీ గవర్నర్ మరోసారి విజ్ఞప్తి చేసారు. అర్హత ఉన్న వ్యక్తులందరూ ఎటువంటి ఆలస్యం లేకుండా టీకాలు వేయించుకోవాలని సూచించారు. ఈ మేరకు రాజ్ భవన్ నుండి ఒక ప్రకటన విడుదల చేసారు.